Tuesday, 9 February 2010

私人點唱之開倉

做一個私人點唱,朋友要求我將十年前idclub.com 的電台宣傳稿放上網重溫,我找到的只有一疊紙,沒有電腦檔案,原來一共有45個版本,我打字太慢,今晚只能先上載15個。

VO:林海峰 卓韻芝

今日,成日都落住毛毛細雨,喺街見到一男一女,個男嘅擔住一把米奇老鼠遮,把遮好細,只係夠遮到一個人,見到佢哋一個左邊膊頭濕哂,一個右邊膊頭濕哂,雨越落越大,但係佢哋就越行越慢。唔知淋濕一邊膊頭嘅感覺係點嘅呢?

愛上我 idclub.com


成日典床典蓆要生要死都冇用架,話嚟就嚟話走就走架嘛,有得俾你算到都唔算愛情啦,冇咗咪由頭嚟過囉,一定要相信自己可以得到更好嘅。

愛上我 idclub.com


本來你一啲都唔鍾意食咕嚕肉,因為又酸又肥,但係同親呀邊個食飯,佢一坐低就叫咕嚕肉;卒之有一日你發覺,當你自己再去嗰度食飯,一坐低就自自然然叫咕嚕肉,你知點解格!

愛上我 idclub.com


好多人同你講過佢唔啱你,佢玩吓架咋,冇好結果架!但係,你硬係好似聽唔到咁,唔理全世界嘅人話你係蠢人,係都要中個頭埋去。真係鍾意嘅都係唔講道理嘅,好多嘢都係自己攞嚟嘅!

愛上我 idclub.com


人嘅記憶真係好奇怪 ,你仲記得佢十年前嘅電話號碼,仲記得第一次去街嘅日子,甚至記得佢呀媽幾時生日。不過,當你想諗起個樣…哈…佢係咪咁嘅呢?竟然諗極都諗唔起,曾經咁重要嘅都會變得模糊,仲有乜嘢係有所謂架?

愛上我 idclub.com


有一日喺街等車,咁啱有架的士停喺我前面,門慢慢開,有個老伯伯落車,之後再扶喺車裡面等佢嘅老婆婆,婆婆隻腳好似唔係太方便,佢哋落咗車之後手拖手慢慢向前行,望住佢哋,我唔記得上車。

愛上我 idclub.com


諗返當初你將自尊放埋一邊,唔理後果係點,鼓起勇氣同佢講你鍾意佢。今日,你又要經過幾千次嘅內心交戰,深呼吸咗好多次,然後開口同佢講你唔鍾意佢,究竟邊一次需要嘅勇氣大啲呢?

愛上我 idclub.com


仲記得第一次同佢映貼紙相嘅情形嘛?大家一齊揀背景,試唔同嘅企法,又怕唔識日文會錯掣。當張相跌出嚟嘅時候,你哋幾咁興奮,仲即係一人貼咗一張喺手提電話背面。攞個電話出嚟睇吓,仲係咪嗰張呀?

愛上我 idclub.com


如果世界上有一個人,食嘅你可同佢分一半,著嘅又可以同佢分一半,甚至你嘅空間,時間,生命,要你同佢分一半你都唔介意嘅話;恭喜你,你已經搵到你嘅另一半。

愛上我 idclub.com


有啲人老咗嘅願望係可以有間屋,屋後面有個花園仔可種吓花,有人就想坐郵輪環遊世界,有啲就想日日都對住啲仔仔孫孫,而我,當我老咗,我想…病咗嗰陣,有人會陪我睇醫生。

愛上我 idclub.com


每次你發脾氣,無理取鬧,佢都唔會出聲,因為佢知道你心情唔好;永遠緊張你多過緊張佢自己,就算你對佢唔係最好,佢都唔會同你計較,邊個?除咗你呀媽仲有邊個?

愛上我 idclub.com


當你食咗一啲好好食嘅嘢,睇咗一齣好好睇嘅戲,去咗一個好靚嘅地方,你都會喺心入面同自己講:「如果佢喺度就好啦。」咁我諗呢個人都幾重要。

愛上我 idclub.com


有啲人每晚臨瞓之前都會許願,希望聽日掛八號風球唔駛返學啦,希望聽日中六合彩唔駛返工、我只係希望,可以快啲瞓著,快啲發夢見到佢。

愛上我 idclub.com


你有冇試過行行吓街,離遠好似見到一個你發誓以後唔要再見到嘅人,係咪佢呢?你開始心跳加速,繼續行呀,定係調頭走呢?佢越行越近,越行越近啦…哦,原來唔係佢…點解,又有啲失望嘅?

愛上我 idclub.com


你仲記得嗰一晚佢同你講要分開,因為佢原來唔鍾意你,佢話你哋性格唔夾,講咗好多意料之外嘅分手理由,雖然你會覺得難過,但係都應該多謝佢,一段感情結束得有原因,總好過無疾而終。

愛上我 idclub.com


其實,我很怕重溫以前的我,舊照片也好,舊稿件也好,但沒有以前的我,那有今日的我;今日的經歷也造就明日的你,人總需要勇敢生存,除了學會承受失戀,更需要面對自己,愛自己。