廿五蚊一個飯 － 海南雞專門店

廿五蚊，一個早餐都食唔到啦，仲要有飯、有雞、有湯，黐線咩！真係黐線，聽講之前賣廿蚊添。

藏身太安樓呢檔海南雞飯，只做外賣，廿五蚊一個套餐，食雞脾就＄33。雞實在好少，切得好細，接近雞絲狀態，但雞肉鮮嫩，冇雪味；飯是重點，係油飯，不是白飯，好勁香茅味，同我在某店吃幾舊水一煲的差無幾，好似仲冇咁硬。

醬有三種，豉油、酸辣、薑蓉，我走薑蓉，由於醬料係直接加落飯，也由於阿姐有少少重手，太多豉油 ，所以咸咗啲。好想叫佢啲醬另上，不過一諗到廿五蚊，就算啦。

跟餐個冬瓜湯，一啲都唔馬虎，仲有幾件冬瓜。

以呢個價錢，呢個水準，真係唔知去邊度搵 ，600萬一層樓唔係窮人恩物，呢啲先係。

 

牛骨鍋 冇甩拖 － 金牌海鮮火鍋

過去一段日子，十次打邊爐，九次都會去同大坑的壹樓火鍋，次數之頻密令人以為我有股份，實情只是朋友開的，而且去開有感情；可惜壹樓在新春前結束營業，一時之間想打邊爐都唔知點算好。

有朋友去過灣仔道的金牌海鮮火鍋，推介咁話，我去過佐敦店的金牌，牛肉的確有水準，好啦，去試試。樓高兩層，一樓全部係房，二樓做散座，地方寬敞。打開餐輩，哦⋯⋯ 貴嘢嚟。

專登去食牛骨鍋，一行出電梯就聞到濃烈的牛雜味，未點其他食物，先點了個煲。牛骨鍋＄228，而家去麵舖叫碟淨牛雜都要一佰蚊，所以個煲的價錢合理。

嘩，好大煲，好多料，牛膀、牛肺、牛腸、牛肚、牛筋全部新鮮貨式，有好幾舊大牛骨，仲有吸哂湯的蘿蔔；全晚不停加水，係加水，唔係加湯，都一樣咁濃。食呢個煲不能太心急，啲料要炆吓佢，等佢入味啲同再腍啲先食。

咁濃嘅湯其實最啱配能夠吸湯的材料，點了豬紅、墨魚滑、西洋菜、蟶子（＄58一隻），豬紅同菜最好；蟶子好新鮮，但係鮮味勁不過牛味，呢個煲不宜海鮮。牛肉是另一個重點，吃了兩款：牛爪邊、牛頸脊，個人比較喜歡有咬口的牛爪邊，牛頸脊則牛味較重，也較肥，但肉質較乾，一碟細碼$288，兩款價錢一樣。

牛骨鍋來了

牛爪邊

牛頸脊

叫得海鮮火鍋，其實唔會平。餐牌有一頁列明很多額外收費，前菜、花生、茶、醬料，一坐低都＄50。服務好好，星期六晚冇乜人，個個部長都行行企企，一遞手就有人埋嚟。

聽講午市點心幾好，可以試吓。

一半一半 － 渝．金富

渝·金富是一店兩吃，四川加西餐，只是夾份做生意，並不是甚麼fusion。

渝其實是銅鑼灣的渝酸辣粉的分陀，提供的食物和銅鑼灣一樣，負責西餐的主廚加老闆，以前在四季酒店打工，而家出來搞生意。

先看地點，不是甚麼鬧市，是在北角城市花園的商場地庫，在勻勻格仔舖有一個倘大的地方，行過會以為是food court，租金應該不貴吧。

看看餐牌⋯⋯點講呢，多款主菜百零蚊有交易，但只在晚市供應，如果有四季的3成水準，都應該抵的，但在一個和food court沒有分別的環境下，百幾蚊一個單點主菜又好像有點貴。有個全日供應的套餐，有前菜、湯、甜品、飲品則賣＄130，指定主菜是紅酒燴牛肋條。百幾蚊食餐晏，在food court環境的地方，點都叫唔落；就算叫一款最平的焗飯、意粉、漢堡包，加升級組合，都要八十蚊左右。

最後，諗唔通，都係食啲辣嘢，醒吓神，點了一個口水雞和四川擔擔麵套餐（其實都＄73)。不消三分鐘，套餐便來了，麵的份量比較細，而且只放了一陣，麵已經呈凝固狀，一舊舊，係唔係整定咗好耐呢？細心的侍應提我快快撈起，要不就乾了，真是到點的溫提。麵的質地撈完還可以，有很濃的川式香料味道，小辣；口水雞，味道同碗麵一樣，哈哈，一如以往都是雞骨、雞皮多過雞肉，很快便吃清了。

其實，呢間餐廳最啱情侶去食，尤其如果你嗜辣但情人係見到辣椒都會標汗的話就最啱，因為呢度可以一次過滿足兩個願望，一於你有你食辣，佢有佢食扒。

可惜，我得一個人，唯有下次才來試他們的西餐，還要先衝破在food count環境下吃百幾蚊餐晏的關口；可以去吃甸拿呀？晚飯可以去茶廳，但我好少去food court的，除非晚上會鋪番張枱布。

又係可能最好食的燒肉店 － Yakiniku Great

主打黑毛和牛燒肉的Yakiniku Great 在日本有幾間分店，香港是海外第一家，大抵知道香港人好多都發日本寒，生意一定冇問題。

老闆是日本人，和牛每天由日本不同的地方送到，供應不同部位，食唔食到啲稀少部位就睇緣份。

店舖位於上環，地方好寬敞，不過稍嫌啲燈火數太猛，勁倀眼。

光顧那天仍然是試業階段，有九折，冇酒牌，所以可以自己帶酒，不收到corkage。

我們5人點了：

和牛壽司（＄30一件）、牛脷（＄158)、和牛Kalbi($88)、Thick Prime Kalbi（$228)、大三角($248)、Misuji（肩胛骨內側肉）、Koyto Style Yaki-shabu($228)、雞腿肉($98)、豬腩肉($98)、牛腸($100)、帶子($78)、蒜頭($60)、雜菜（＄98)、粟米（＄60)、蕃薯、沙律（＄98)、泡菜（＄70)、冷麵（＄90)。

第一碟燒的是牛脷，一放入口，大家都異口同聲：嘩，好味喎。「好味喎」呢三個字基本上全晚冇停過。一句講哂，日本牛真係唔同味，加上譬如 Misuji呢啲部份，燒幾秒，然後捲埋放入口，又香又脆又甜又軟，真係以為去咗日本；價錢都好合理，一碟5片，$298。

最貴係 Koyto Style Yaki-shabu，＄228，一。片，真係唔知點解要咁貴，面頭有啲糖霜，燒的時候加點醬油，燒完蘸落啲蛋度。老實講，我食唔到咩味，因為我地只係叫咗一。片，5餅2魚，5個人分；其他嘢已經好好味，下次唔食呢塊都可以啦。

之前去完298 Nikuyu Room 覺得係全港最好食的燒肉，睇嚟遇到對手。

串燒 x 酒吧 ＝ 好賺 Bilibala Yakitori Bar

隨意搜尋，搜到這一間 - Bilibala Yakitori Bar

銅鑼灣希雲街，一條正被發展的小街，因為附近有新落成的大型豪宅，三萬蚊一呎那種；原本存在的，車房、洗衣店、糖水舖都執得七七八八。希雲街？邊條啊？Via Tokyo就喺街口，行入啲有富山拉麵。

Bilibala Yakitori Bar 要再行入啲，就喺正未入伙的豪宅對面，舖仔細細，有一列個半開放式的bar 枱位，坐到出街，即係可以食煙，另外有一兩張枱。

酒類選擇算多，一心來吃串燒，自然飲 sake，6個人，好口渴，一共飲了三枝。

食物方面，要自己剔，但係剔𠴱張紙冇價錢，有價錢的在另一張餐牌上面，於是剔食物時，不會知道剔的食物幾多錢，店方一定有研究過先會咁做，我個人認為咁樣唔係幾好；而餐牌上面的價錢都是一串的價錢，大家要留意返。

食物類型都係嗰啲，牛舌、安格斯牛柳、煙肉車厘茄、免治雞肉棒、雞軟骨、雞翼、雞腎、雞肝、帶子、廣島蠔、冬菇、粟米、豆腐、鯖魚，每樣兩、三串。質素算不錯，不過算不上出色。難食的有大腸，臭的，還有白鱔，乾、腥、有骨；燒明太子燒得幾好，＄108 一條，帶子好大隻，不過出哂水，唔夠時間解凍囉。

想去光顧的人當呢間係一間酒吧，食物當係客串會好啲。

埋單＄4200，每人七佰，扣除酒錢，食物＄400，唔飽。我想知Openrice 食評，話食$200 同$300啲人係食咗咩？

每一間食肆總有一個敗筆 - Futago HK 大阪燒肉

早前，有兩個朋友都同我講，話鍾意睇我以前寫過嘅「每一間食肆總有一個敗筆」系列，真係㗎？好啦，難得有人LIKE，寫返啦。

每一間食肆總有一個敗筆 － Futago HK 大阪燒肉

呢間都幾人氣，晚市一定要訂位，一講日本開過嚟，個感覺又好似正宗啲咁，又的確係喎，不少顧客係日本人，再放心啲。

間舖幾細，我哋嗰晚坐嗰張枱，話係8人枱（我哋5人前係啱啱好），超過10個人，你有咁瘦都冇咁大張枱。

食物係不錯，起碼肉類有應有肉質同味道，牛有不同部份，不同來源，難得侍應可以答到你條牛腸係來自咩牛。留意返，餐牌某啲食物係會有侍應幫你燒嘅，如果你有密偈傾就唔好點嗰啲，如果個侍應生得靚就點嗰啲，明未？

「大得驚人牛小排」（＄158），好似奪命狂呼個骷顱頭面具咁多，呢件係最好食，因為比較多油份，枱枱都叫咁滯，而且有表演，當侍應開始幫你燒嗰陣就會大聲講一堆日文，同拍手，好熱鬧㗎。

敗筆係咩呢？正所謂成也風雲，敗也風雲，都係「大得驚人牛小排」，去食BBQ少少油煙梗有，但一燒呢一塊，你睇吓大煙到呢，真係冇改錯名，真你大得驚人。大家去食的話記得着啲就嚟丟嘅衫去。

Futago HK 大阪燒肉

銅鑼灣伊榮街1至5號地下B舖

跑馬地茶餐廳小菜 －佳餚美饌

繼續小菜系列，又睇睇食乜：

蓮藕餅

龍蝦撈麵

粉絲蟹煲

豉椒炒蟶子

薑蔥炆斑頭腩

豉油雞

啫啫唐生菜

呢間佳餚美饌係朋友介紹，話抵食又免開瓶，好啦，有人生日又去試吓。

海鮮要預訂，最出名係個龍蝦麵。

可能知我哋肚餓，第一碟出場的竟然就係個龍蝦麵，用兩隻龍蝦拆肉，上湯煮，再加薑蔥、蝦子，粗麵墊底，確然幾好食，味道略鹹。

其他菜都陸陸續續上場，比較矚目係碟蟶子，因為平時啲菜館都係炒埋一碟就上枱，邊有人排到扇形咁好心機。

薑蔥炆斑頭腩，好食，食咗一舊想再食都冇。

豉油雞，應該係新鮮雞，都幾鹹。

粉絲蟹煲 ok 啦。

總括嚟講，幾抵食 ，呢餐埋單＄3500 ，9個人。

雖然喺跑馬地，但係冇咩裝修，而且前身係茶餐廳，所以啲裝置有啲奇怪，仲會聽到廚房炒餸時的”哄哄聲”真係熱鬧。

另外，服務一般，又係嗰啲叫佢可以攞個生日蛋糕出嚟，係會連紙袋放上枱嗰隻， 大家想去的話就留意番要冇咩要求。

隱泉， 真的好吃嗎？

久聞大坑隱泉好評， 可惜長期客滿，座位也有限， 一直未有機會一嚐， 終於開了分店。

新店於天后水星街， 環境寬敞， 新開張， 全晚3， 4 枱，靜靜的。

食物質素， 有些好， 有些一般。

有一味信玄袋， 腐皮在外， 裡皮包著切碎的帶子和青椒，基本上袋還袋， 餡還餡， 餡料淡而無味， 著實令失望。

無味的

信州燒蠔， 加了麵鼓醬去燒蠔， 這個是挺不錯的， 蠔也肥美；萬能惹雞肉也好， 因為雞肉是用了日本走地雞。

侍應介紹一些餐牌上沒有的， 例如： 汁煮梅貝， 清酒煮蜆， 生薑豚肉陶板燒， 都是不錯的。

冰頭漬（三文魚眉軟骨）

其餘都是燒雞翼， 牛脷， 雞泡魚乾， 蒜頭， 大蔥， 銀杏， 洋蔥， 南瓜， 青椒仔， 芝士年糕⋯⋯ 很多蔬菜呢。

實在味道是一般， 不知道為甚麼那麼多好評， 可能兩邊的爐頭不同？結帳兩千， 拿帳單和前幾星期去過的南蠻亭相比， 嘩， 這裡的每一項食物也比南蠻亭， 如廣島蠔這裡＄40一串， 南蠻亭賣＄30， 雞翼＄30 VS $25， 雞軟骨＄24VS＄20， 青椒仔＄28 VS＄15， 一坐低便有的蔬菜條， 南蠻亭， 4 人放兩兜＄36， 這裡4人放一兜大的＄50。不是有心比較， 只是好奇， 一比之下又幾有趣， 每項收多少少， 都說做爐端燒幾好賺。

凍蕃茄＄40

燒廣島蠔

整體來說， 我想不到理由不去南蠻亭而去隱泉， 想不通 。

有待改進 ﹣ 權八

上次去「竹壽司」的時候， 師傅告之集團將有新動作， 就是在利園開「權八」。「權八」最聞名的就是江戶風的裝修，Kill Bill 也用來作場景。我並沒有去過東京的「權八」， 所以香港開了便急不及待去試。

致電訂枱時， 留底姓名， 電話， 臨掛線時， 接線生交帶一句： 我們hold 枱15分鐘， 如果要改時間請打電話通知。Reception  很繁忙嗎？如果是Mou Mou Club 我完全理解， 此等情況經常出現， 但不會出現在一些高級餐廳 。

踏出電梯， 門口黑漆漆的， 經過走廊有間造蕎麥麵的個室， 不過裡面沒有人。

東京「權八」裝修是一大賣點， 香港這一家也沿用深色船木， 有靠窗的座位也有bar 枱， 我們4人坐到靠窗的位置。

店內的燈光偏暗， 播放著江戶時代的音樂， 三弦琴之聲此起彼落， 音量也是頗大的。

點飲品， 看到有YUZU MOJITO （＄88）便點了一杯，偏甜， 味道一般， 早知飲Highball  比較正常。

食物的選擇說多不多， 說少不算少， 刺身、壽司、天婦羅、串燒都有。侍應沒有特別介紹甚麼食物，我們隨意點就算。

雞腎， 雞翼， 自家製的免治雞肉軟骨 ， 燒得出色， 材料新鮮也因為他們用的是備長炭， 令食物多了一重炭燒味。

帶子是肥美的 但醬汁太甜

怎會少了燒雞翼？

燒吞拿魚腩

我覺得麻麻地， 可能太油膩。

5 款刺身併盤， 很新鮮。

燒青椒

炸鮮蟹肉餅， 外皮鬆化，蟹肉也鮮， 但加了不知忌廉還是鮮奶， 感覺有點膩。

這個炸櫻花蝦餅， 很少櫻花蝦。

蕎麥麵的確出色， 麵汁也有濃厚的木魚鮮味， 想要多一個汁， 要另外多收二十多元， 但其實那個汁的份量足以二人或三人分享， 我們想不到這一點， 侍應也想不到。

牛舌， 芝士沒返貨， 海鰻賣光， 一位較資深的侍應說仍然是試業階段， 入貨比較少， 而我們也反應了音樂的問題， 她認真地拿來了一本簿， 請我們寫低意見， 挽回一點誠意分。

會不會再來？很難說。