串燒 x 酒吧 ＝ 好賺 Bilibala Yakitori Bar

隨意搜尋，搜到這一間 - Bilibala Yakitori Bar

銅鑼灣希雲街，一條正被發展的小街，因為附近有新落成的大型豪宅，三萬蚊一呎那種；原本存在的，車房、洗衣店、糖水舖都執得七七八八。希雲街？邊條啊？Via Tokyo就喺街口，行入啲有富山拉麵。

Bilibala Yakitori Bar 要再行入啲，就喺正未入伙的豪宅對面，舖仔細細，有一列個半開放式的bar 枱位，坐到出街，即係可以食煙，另外有一兩張枱。

酒類選擇算多，一心來吃串燒，自然飲 sake，6個人，好口渴，一共飲了三枝。

食物方面，要自己剔，但係剔𠴱張紙冇價錢，有價錢的在另一張餐牌上面，於是剔食物時，不會知道剔的食物幾多錢，店方一定有研究過先會咁做，我個人認為咁樣唔係幾好；而餐牌上面的價錢都是一串的價錢，大家要留意返。

食物類型都係嗰啲，牛舌、安格斯牛柳、煙肉車厘茄、免治雞肉棒、雞軟骨、雞翼、雞腎、雞肝、帶子、廣島蠔、冬菇、粟米、豆腐、鯖魚，每樣兩、三串。質素算不錯，不過算不上出色。難食的有大腸，臭的，還有白鱔，乾、腥、有骨；燒明太子燒得幾好，＄108 一條，帶子好大隻，不過出哂水，唔夠時間解凍囉。

想去光顧的人當呢間係一間酒吧，食物當係客串會好啲。

埋單＄4200，每人七佰，扣除酒錢，食物＄400，唔飽。我想知Openrice 食評，話食$200 同$300啲人係食咗咩？

跑馬地茶餐廳小菜 －佳餚美饌

繼續小菜系列，又睇睇食乜：

蓮藕餅

龍蝦撈麵

粉絲蟹煲

豉椒炒蟶子

薑蔥炆斑頭腩

豉油雞

啫啫唐生菜

呢間佳餚美饌係朋友介紹，話抵食又免開瓶，好啦，有人生日又去試吓。

海鮮要預訂，最出名係個龍蝦麵。

可能知我哋肚餓，第一碟出場的竟然就係個龍蝦麵，用兩隻龍蝦拆肉，上湯煮，再加薑蔥、蝦子，粗麵墊底，確然幾好食，味道略鹹。

其他菜都陸陸續續上場，比較矚目係碟蟶子，因為平時啲菜館都係炒埋一碟就上枱，邊有人排到扇形咁好心機。

薑蔥炆斑頭腩，好食，食咗一舊想再食都冇。

豉油雞，應該係新鮮雞，都幾鹹。

粉絲蟹煲 ok 啦。

總括嚟講，幾抵食 ，呢餐埋單＄3500 ，9個人。

雖然喺跑馬地，但係冇咩裝修，而且前身係茶餐廳，所以啲裝置有啲奇怪，仲會聽到廚房炒餸時的”哄哄聲”真係熱鬧。

另外，服務一般，又係嗰啲叫佢可以攞個生日蛋糕出嚟，係會連紙袋放上枱嗰隻， 大家想去的話就留意番要冇咩要求。

加州肉汁濺到來 ﹣ CaliBurger

香港曾經有一陣個漢堡飽風， 大家還記得排到人山人海的shake n bun 嗎？不過， 似乎都是一陣風， 熱潮一輪， 又回復平淡。雖然， 漢堡飽風不熱熾但有質素的店其實也不少。

來自美國的Caliburger 落戶香港， 如果你認識也喜歡也期待 In-n-out burger會來香港，你應該會仆倒來這裡， 因為其實它是in-n-out 的海外版。

新店在軒尼詩道， 店內裝修簡單， 燈光火猛， 一個快餐店格局， 座位也不算多， 應該主打外賣人流。

廚房人手充足 

今天試了他們的DoubleCali ， 雙層牛肉漢堡， 他們的牛肉是美國運來的， 而且不是frozen  貨， 又的確那漢堡扒十分juicy 兼鬆化， 而飽裡的生菜一蕃茄都很新鮮；飽也是一個亮點， 煎過的飽又鬆又軟又熱， 我不是一個愛飽的人， 也邊吃邊讚。一分錢一分貨，賣＄78， 的確貴， 加＄20 有汽水， 薯條combo， 咁就一百蚊埋啦；如果不用雙層， 芝士漢堡＄38， 又平好多喎。

雙層牛肉、蕃茄、生菜、溶化的芝士，每一個環節都高質素。

除了看牛肉有多juicy也要看看那個飽， 那鬆軟是看得出來的。

小食方面雞翼有兩款， buffalo wings 和BBQ wings， 看到有buffalo wings  讓我心裡燃起了一絲希望。我對buffalo wings 充滿passion  ， 香港沒有哪一家的buffalo wing 做得8成似美國哪些， 以前 Dan Ryan 可能可以， 不過越來越不像樣。 可惜，這裡的也失望。 首先雞翼只有雞鎚， 那麼餐牌應該改一改做“水牛城雞鎚”，雖然他們都有跟Blue Cheese， 但整體味道過咸， 辣度很微。BBQ Wings 還可以。向負責人反映buffalo wings 的味道， 他說應該先吃buffalo wings 再吃BBQ wings， 因為BBQ sauce 味濃， 會把buffalo wings 的味道蓋過……   隨便你。

Wild style fries ， 炸薯條淋上醬汁加洋蕙， 十分惹味也十分亞美利堅口味， 要趁熱食， 凍了便硬繃繃。

店內有充電服務

推介這裡的漢堡飽， 應該會再來的。