Thursday, 26 March 2015

每一間食店總有一個敗筆 - TOWN


想在銅鑼灣靜靜哋食個晏,有朋友介紹去位於Cubus 的TOWN,食西餐。日頭食飯想有日光,呢度有,唔坐窗口,唔怕冇搽防曬。
Set Lunch $168起,包頭盤buffet,湯,甜品,咖啡茶,想要main course ,多幾十蚊,選擇都幾多。頭盤好多沙律,OL最愛,我就隊煙三文魚。食菜飲湯,我梗係唔飽,所以點main course ,是春雞。
春雞好嫩,一鋸落去連骨都鋸斷,肉嫩有汁,煎得剛好,但墊底cous cous加埋個黑醋汁有點酸,不過算幾好。朋友個Beef Cheek Risotto 都好食,risotto 話已經就咗香港人口味,煮得冇咁硬,可能因為我是香港人,所以覺得剛好;牛面頰好腍,仲有兩大件。


基本上,食物、環境樣樣都不錯,敗筆就是侍應。他們的服務態度是不錯的,但食食吓其中一位過來問覺得食物如何,然後就開始介紹大廚背景。她說大廚以前在某某酒店的某某餐廳做主廚,若果不是有水準,5星級酒店都不會請他啦⋯⋯ 
侍應其實應該留意返,你覺得是賣點的賣點,對顧客未必有用。同行友人未聽過那家餐廳,還好;我則心諗:嘩,間嘢得個view ,嘢食出名差。
正如有次去行I.T,sell 屎姐姐同我講:「呢件新返㗎,容祖兒都買咗。」我即刻放低啦,真係覺得我好想同容祖撞衫?
所以,提供資料時要留意返啦。
TOWN
銅鑼灣開平道一號 CUBUS 十樓

No comments: