Tuesday, 31 March 2015

每一間食店總有一個敗筆 - 秀殿

前身為同名店,賣蛋包飯,英文名叫Hidden, 可能覺得隱閉啲會矜貴啲,不過再前身是一間威士忌加燒酌吧,我估又冇乜人知,嗰陣就真係Hidden。賣奄列飯利潤有限,所以老細那店轉型做串揚,有酒水供應對一間食肆來就是很重要的。

串揚就是串住啲食物來炸,簡單一句炸嘢。炸嘢來講,我只喜歡吃家鄉雞,不過聽聞這裡的食物好地道,炸嘢之外都有其他嘢食,咁又試吓。

全店12個吧枱位,加一張4人枱,來到的時候已經是夜晚十點半,只得兩三人,快快趣趣叫嘢食。酒盜芝士、明太子、魚餅、煮野菜,樣樣都好色,好鬼日本。

串揚類都好食,炸得唔乾,個炸槳聽講溝咗山芋落去,令外皮酥脆,麵包糠又特別磨細,避免太吸油,食材由日本來不在話下。 這店另一主打是燒酌,款式十分多,麥、芋、黑糖、紫蘇,連辣椒都有。


原本呢餐冇乜問題,地方ok,食物幾好,仲開得夜,但敗筆又出現。結賬時,朋友發現有21杯茶,$630 ,冇咩嘛?去完沙漠咩,我哋得3個人,飲咩21杯茶?問侍應,由於時間關係,很快再送來另一張單,茶,4杯,$30杯。我們見由21 減到4便收貨啦;後來才發現,茶只飲了兩杯,咁都收多咗兩杯。



你問我,覺得他們是故意嗎?我覺得有可能,不過未必是店的問題,是侍應的問題,尤其是我們飲了10杯燒酌,便以為有機可乘,可惜遇上精明眼。



食宵夜被收多錢是經常發生的事,是經常,飲酒的人最易被人搏矇,遇上這個情況,記得check單。



No comments: