Monday, 3 October 2011

向西望

好勝算GiGi , 莫文蔚,郭羨狸三位的婚訊, 令全城中女hurray , 一夜之間振作起來,幾個適婚中女代表都嫁得去, 真係戀愛會在不遠處, 仲唔輪到我?

如果你有咁嘅諗法真係太naïve ,咪以為人嫁得出你又嫁得出,要睇清楚個狀況。莫文蔚,芝芝梁都係嫁老外, 郭羨妮就嫁大陸人, 你仲開心得落?咁係代表咪香港冇男人啱囉。

唔係話冇筍盤,一早講咗三四十歲嘅男人, 一係結咗婚, 未結婚有事業就會揀廿幾歲嘅做女朋友(係廿幾歲唔係幾廿歲), 拍吓拖, 享受吓俾人崇拜嘅感覺,單身冇事業都係揀廿幾歲拍吓拖先;中女想搵可依偎的胸膛, 唔駛諗。

各位中女睇嚟都係時候檢討吓識男人策略,向北望之餘,仲要向西望, 嘗試打開一下海外市埸, 可能有機會有意外收獲,留喺香港困獸鬥,唔掂。查實點解戀老外比較易,因為佢哋根本唔知咩叫港女,中女, 剩女,宅女諸如此類嘅標籤,成件事就正面好多。

試過問一個海外男人知唔知咩叫港女,佢話港女即係獨立, 能幹, 不依賴,聽到呢個答案真係令人欣慰。冇錯,呢幾種的確係港女的特性,究竟已經唔存在,定係被太多港女負面新聞淹沒咗?

只想講, 如果想嫁得出, 搵個唔知自己身世,成長背景嘅人都係一個辦法, 知得越少,幻想越大,至少唔會先入為主, 對港女有個爛印象先。

( 呢篇寫廣東話, 因為想試吓咁寫會唔會爽啲。)

3 comments:

人 said...

的確會爽d 抵死d 讚

dee said...

反而有少少讀得辛苦左 ...

南方舞廳 said...

dee : 你文化水平高了。